Hrossaræktarfélag Hrunamanna fagnaði 100 ára afmæli sínu fyrir stuttu. Til að minnast þess var m.a. sett upp myndasýningu af ræktunarhrossum félagsmanna í gegnum tíðina. Hver og einn hafði frjálsar hendur með það sem þar kom fram. Við tókum að sjálfsögðu þátt, og sjá má nokkrar af  okkar myndum hér fyrir ofan. 

Alltaf er gaman að taka á móti fólki sem vill heimsækja mann. Nemendur frá leiðsögumannaskólanum komu fyrr í vetur, og kynntu sér sveitabúskap. Þá voru á ferð fyrir stuttu síðan félagar í Hrossaræktarfélagi Biskupstungna. Þökkum við öllu þessu fólki kærlega fyrir komuna.

Hestamannafélagið Smári er búið að halda tvö púnktamót af þremur í vetur, en Maja tók þátt á systkinunum Krummatá (á 5. vetur)  í unghrossaflokki og Hrímfaxa (á 6. vetur) í fullorðinsflokki 2, en þau lentu í 3. og 5. sæti í þessum flokkum.  

Svo voru það smalarnir knáu sem fóru á snjósleðum í vikunni inn undir Kerlingarfjöll til að sækja tvílembu frá okkur. Sleðamenn úr Hafnarfirði voru á ferð fyrir viku á þessum slóðum og létu vita um kindurnar sem þeir sáu þarna. 
En ekki er öll sagan sögð, því á leiðinni heim fundu okkar menn einlembu frá Hilmari í Syðra-Langholti, móts við Svínárnes.
Vitað var að þessar skepnur vantaði í haust, og mikill fögnuður heima fyrir þegar komið var með þær heim. Hafið kæra þökk fyrir þetta allt saman, elsku karlarnir.

Bláskeggur og afkvæmi hans, þau Blástakkur og Lilja, hafa það greinilega gott í Þýskalandi og er nýji eigandinn mjög ánægður með þau.

Á föstudaginn var fórum við að taka út tryppin okkar hjá Bylgju Gauksdóttur.
Hún sýndi okkar þau bæði, Glitni og Svertu, og koma þau mjög vel út hjá henni. Sátt og jákvæð, og sýndu mjög flotta takta. Bæði sýnd á 8mm skeifum án þyngingar. Skoðið myndir af þeim hér fyrir ofan.

Last Friday we went to see some of our youngsters in training by Bylgja Gauksdóttir.
Glitnir frá Hrafnkelsstöðum 1, stallion born 2008, is really promising. Everything seems very easy for him, and he looks very pretty under the rider already after little training.
Sverta frá Hrafnkelsstöðum 1, born 2007, has potential to be very good. She is lovely to work with and has a great look under the rider! 
Both on normal 8mm shoes and no weight on all the pictures! 

Það er nú meira hvað tíminn æðir áfram. Daginn er sannarlega farið að lengja, það má merkja á birtunni í báða enda dagsins. Verst hvað hefur verið umhleypingasamt, því það tefur alla útivinnu.


Inni er bjart og hlýtt, og kindur og hross éta eins og allir geta í sig látið. Kapparnir Helgi Gíslason og Janus komu einn laugardaginn í lok janúar og rökuðu 23 folöld auk þess að klippa hófa á þeim og stórum hluta af útistóðinu. Sannarlega kappar á ferð. Takk takk strákar.


Margar fallegar línur komu í ljós er lubbinn fauk af folöldunum, og fór svo að tvær prinsessur frá Austurási fóru á folaldasýningu samdægursog komu báðar heim með "fyrstu verðlaun" (dómarakosnar og af áhorfendum). Til hamingju með það elsku Ragga og Haukur. Gaman að hafa þessar fegurðardísir undir þaki  hér á bæ.

Við Haraldur höfum svo verið að klippa það sem eftir var, og enn eru nokkur folöld ókomin.
Á næstunni stendur svo til að líta á tamningatryppin okkar sem eru af bæ.

Ekkert lát er á nóvemberblíðunni, enda var sauðféð ekkert kuldalegt þegar rúið var í vikunni.
En það er stundum votviðrasamt og gæti orðið til þess að hross fengju holdhnjúska. Við reynum að fylgjast með því hér á bæ, en höfum ekki orðið vör við neitt ennþá.
Byrjað var að gefa folaldshryssunum heyrúllur í gær, en þær hafa hingað til verið á ábornu túni.
Í mikilli bleytu er hætt við útvatnaðri beit, þó jörðin sé grænleit.

Öll tryppin sem voru í hausttamningu eru nú komin heim. Við sóttum Stöng (Spangar og Stáladóttir) til Janusar, en hún fer vel af stað.
Þær voru einnig sóttar þær Rödd (Tenórsdóttir og Ertu) og Hemra (Hróðursdóttir og Lindar) að Austurási. Þær voru sýndar okkur í reið af þeim Röggu og Agnesi Heklu, og fóru þær fallega hjá þeim. 
Glitnir 3ja vetra Gaumssonur (ógeltur) var sóttur sl. föstudag austur að Efri-Rauðalæk til Bylgju og Óla eftir ca. 3ja vikna tamningu. Hann var sýndur okkur í reið, en það gerði Elsa Hreggviðsdóttir Mandal sem er að temja hjá þeim. Er skemmst frá því að segja, að það tókst með miklum ágætum. Takk kærlega fyrir.

Við viljum einnig senda kveðjur til eigenda nýkrýndra heiðursverðlaunahryssna. Innilega til hamingju.

Jæja gott fólk, það er október, og ekkert skrifað síðan í ágúst. Viðmiðið var nú samt að gera hverjum mánuði smá skil. 
Í september eru miklar annir hjá sauðfjárbændum, svo var og á þessum bæ. Farið var í afréttarsmölun 9. og 10. sept. og verið í viku, en réttardagurinn var föstudaginn 16. september. 
Þar sem húsmóðirin á bænum er svokallaður "trússari" ásamt því að elda mat í mannskapinn, þurfti heilmikinn undirbúning fyrir ferðina, svo sem innkaupa á vistum og fleiri. 
Þá var hafin sauðfjárslátrun á Selfossi, en þar sér fyrrnefnd kona um skipulagningu sláturfjár að húsinu.

Svo varð húsbóndinn 70 ára þann 15. sept., og var þess minnst við réttarsúpuát og fleira góðgæti. Um 200 manns litu við í fjárhúsinu og þáðu veitingar. 
Kærar þakkir fyrir komuna þið öll!

Hér á bæ eru einnig nokkuð mörg hross sem þarf að fylgjast með og sinna. Hryssurnar sem haldið var komu heim úr graðhestagirðingum, flestar fyljaðar, en þær sem ekki héldu voru annarsvegar Blástjarna okkar, en hún er orðin gömul og væntanlega hætt folaldseignum, og hinsvegar Sóldögg frá Breiðumörk hans Uli Reber sem einnig kom fyllaus.
Búið er að setja þær hryssur sem ganga með folöldum á nýjan og óbitin haga, og eins og alltaf við slíkar breytingar þá græðast hryssurnar, en það merkjum við í miklum leik og kátínu í folöldunum.


Tvær 4ra vetra hryssur fóru í framhaldstamningu til Bylgju og Óla á Rauðalæk, og svo fór einnig 3ja vetra ógeltur foli undan Gaumi og Blástjörnu til þeirra fyrir rúmri viku, þegar við sóttum aðra hryssuna. Frábær vinna hjá þessu elskulega pari. 
Þriggja vetra Stáladóttir og Spangar fór til Janusar. Og einnig tvær þriggja vetra í Austurás, önnur undan Tenór frá Túnsbergi og Ertu, hin undan Lind og Hróðri frá Refsstöðum.
Ómetanlegt að eiga góða að.

Lygna í 1. verðlaun


Maja og Hrímfaxi að keppa í B-flokki, Haraldur og Fölvi í barnaflokki.